Phokas

Dr Phokas (mittelgriechisch Fokas Φωκάς, latiin. Focas oder Phocas; * noch 547 z Thrakie; † 5. Oktober 610 z Konstantinopel) isch vo 602 bis 610 Kaiser vom Oströmische bzw. Byzantinische Riich gsi. Er isch dr erst erfolgriichi Usurpator in dr byzantinische Gschicht gsi und het si Vorgänger Maurikios und däm sini Söön brutal lo ermorde. Dradizionell gältet er as e despotische Herrscher, wo d Regierig von em s Oströmische Riich erschütteret häig.

S Riich under em isch vom ene Bürgerchrieg blogt worde und isch nume nid zämmebroche, wil die alti Verwaltig no funkzioniert het. Dr Perserköönig Chosrau II. het Nordmesopotamie, Armenie und Däil vo Ostchläiasie erooberet. Uf em Balkan isch s wäärend siner Regierigszit rueig gsi, aber churz druf häi d Slawe s Land dört afo übernee. In Italie het er de Langobarde usser em Exarchat vo Ravenna alli Gebiet gloo, wo si übernoo häi.

Dr Herakleios dr Elteri, dr Exarch vo Karthago het sich mit dr byzantinische Opposizioon zämme do. Si Soon Herakleios isch mit ere Flotte uf Konstantinopel gfaare. Dört isch dr Phokas ermordet worde.